Image default
حياتية

تيتا سيدة بتحكي العذرا وبتوكلها أمرها وهيك العذرا ساعدتها – حدث معي – زياد الرموز

الأربعاء ٣٠ ايلول ٢٠٢٠
مساء الخير يا زياد انا قريت حدث معي يلي كتبته ب ٢١ ايلول عن جوزف وسابين لما زرتوا بيوت عيل محتاجة بالأشرفية وصراحة استوقفتني جملة وحدة لما كنت ببيت تيتا سيدة بتقول فيها فتحت البراد كان مطفي وفي قنينة مي… انا مش ساكنة بلبنان وبدي ساعد هالختيارة بمبلغ صغير بتمنى تعطيها ياه او تشتريلا حاجتها بس بدي اتمنى منك تبعتلي صورتها وما تفهمني غلط مش قلة ثقة بس لأن حرقتلي قلبي ولو كنت بلبنان كنت زرتا… وللحقيقة شرحتلها انه انا ما بحب حط صورة حدا ولا ابعتا لحدا لما ربنا يريد يبعت رزقة لإنسان الشياطين بتخضعله… بس ما بعرف حسيت انه مش لازم اوقف بدرب هالمساعدة خاصة انه تيتا سيدة فعلا بحاجة لكل مساعدة حتى لو ما طلبت..
وفعلا هالست بعتت مصاري مرقت سحبتن ورحت طلّ على تيتا سيدة يلي متل عادتا مدورة تيلي لوميار صلاة.. وقاعدة على كنابيتها الوردية وقدّاما على الطاولة مزهرية فايح عطرها بهالأوضة مع انها اصطناعية وصورة العذرا حد هالوردات والشمعة يلي محضرة حالها تضوي مقابيل هالايقونتين … ايقونة العذرا والايقونة تيتا سيدة… والمسبحة النايمة حد هالشمعة كأنها عم ترتاح قبل ما ترجع تحملها سيدة وتبّلش صلاتا…
لك ريتك تقبر قلبي شو جابك.. يا حبيبي انت ليش جيت اليوم بيك شي؟ حبيبة قلبي انا كتير منيح جايي شقّ عليكي وجايبلك غرض معي بس خلّيني فوت واحكيكي وانتي خلّيكي بعيدي احسن ما كون عم اجبرا اطلع عم اكسرا وإعديكي كورونا… اتطلعت فيي قالتلي كورونا ؟! ومنك؟ تقبر قلبي بيت بيتك فوت قعود مطرح ما بدك وهيك خبّرتا القصة وقلتلا انتي بتقوليلي انك بتحكي العذرا وبتوكلي أمرك والهيئة العذرا وصلت مواصيلا لبلاد برّا وبعتتلك هالست حتى تقدملك هالمبلغ… واتطلعت بالعذرا وابتسمت وضحكت وبكيت وتدقّ على صدرا وتطلبلنا من السما والارض…
يا سيدة يا حبيبة قلبي انا ما سألت حدا يبعتلك صدقيني بس هيدي الست هيك قررت.. وبدي اطلب منك طلب صغير ما تزعلي مني اذا فيكي تحكيها تسلمي عليها وتشكريها بمعرفتك لأن حمّلتني الأمانة وهيي حبّت تتعرف عليكي….وبما انه ما علّق الخط بعتت تيتا سيدة رسالة صوتية قالتلا يا بنتي قديش ما بدي اتشكرك يخليلي ياكي طلبي مني شوفيني قدملك…
سيدة هالست الأرملة من عشرين سنة خدمت زوجا المريض سنين وسنين وما تخلّت عنه ولا لحظة مع انه صرلا ظرف تسافر وهوي ينحط بمأوى..رفضت و بقيت حدّه تخيط وتخيط وتخدمه وتصرف عليه.. ربنا ما رزقا ولاد بس كانت ام بمحبتا وعاطفتا لولاد قرايبينا وجيرانا….
عم خبركن عن سيدة… مش حتى اعرض حالتا الحرجة المادية وغيرها.. مش حتى احكيكن عن معاناتها وحياتا.. فقرا وتعتيرا.. ولا عم اطلبلا شي . عم خبّركن عن سيدة هالنوع من الناس يلي مجتمعنا ومنن انا افتقدنا لصفاتن…
سيدة ابتسامتها ما بتفارقها… الفرح بقلبها مش طبيعي.. بتفكرها عايشة وحدا بس هيي عايشة مع مريم ويسوع وكل القديسين يلي معلقا صورن على الخزانة والحيطان، بتفكرها عايشة بهالأوضة بتخت مخلّع وشراشف مرتية… وحيطان النش وملاحم الحرب والأهمال مرسومة عليها بس هيي عايشة بقصرا بشبابيك العالية والبرادي المخملية والتخت المذهب وحيطان من حجار الصوان…
سيدة متلا متل هالكبار بلبنان صار عالمن اربع حيطان وتخت… لا حقوق لا ضمانه لا استقرار لا ..ولا.. بس كرامتن هني حافظوا عليها بصمتن وايمانن انه يلي خلقن ما بيتركن.. هالبيت مش بمخيّم ولا بمناطق نائية.. هالبيت بالأشرفية… حد المباني العالية والشركات والمصارف… يمكن منمرق مليون مرة قدّامه وما منتطلع… تعلّموا اتطلعوا تعلموا دقّوا بواب ما بتعرفوها .. دقّوا بواب ما بتخذلكن .. بواب بتفتحلكن وبتفتح معها بواب السما…
بواب بتعلمكن الوفا الصبر الايمان والقناعة..والامتنان.. بواب بتعلمكن تصلوا.. بواب بتعلمكن تعيشوا الحياة بحلوة وبمرها .. تعيشوا وتتكلوا على ربنا … تعيشوا بكرامة وعزة نفس .. تعيشوا شبعانين حتى لو برادكن فاضي تعيشوا دفيانين حتى لو ما عندكن قطعة تياب ..تعيشوا مكتفيين حتى لو ما عندكن شي.. تعيشوا مش كرمال تعيشوا.. تعيشوا كرمال تحبّوا وتنحبّوا…
لو قد ما ارتفعتوا بالحياة.. وقد ما عليتوا وقد ما بعدتوا وقد ما جمّعتوا اذا بقلبكن ما في رحمة ما بحياتكن رح تعرفوا السعادة ولا رح تعرفوا السلام… اطلعوا من الأنا يلي فيكن. اطلاعوا من شرنقتكن وحلّقوا بجوانحكن وعلّوا بعالم الانسانية عالم التضحية والعطاء وخلّي اعمالكن متل عطر البخور يفوح عطرها وين ما نوجد.

Related posts

يبيع “الغزلة” لمساعدة شقيقته على متابعة دراستها في الخارج

Baladimedia

سليمة احترق قلبها على ابنها المهاجر – حدث معي – زياد الرموز

Baladimedia

تصلي كل ليلة لعزرايل, فما كان السبب؟ حدث معي – زياد الرموز

Baladimedia