Image default
حياتية

تصلي كل ليلة لعزرايل, فما كان السبب؟ حدث معي – زياد الرموز

الأحد ٢٧ ايلول ٢٠٢٠
الله لا يوفقك على هالصلاة يا ليلى… بتصلي كل ليلة لعزرايل؟! لك شو بسمّوا هيدا خرف او ايزهايمر؟ …ضحكت وقالتلي هلّق جايني آخر هالليل تتملقسني؟ عزرايل متله متل كل الملايكة بس هيدا عنده مهمة يقبّض رواح!!… صلّبت ايدي على وجّي قلتلا ما تزعلي مني لك ريتو عزرايل يجي ياخدك ويقشّك..مازال متله متل كل الملايكة ليه ما بتصلي للملاك جبرائيل بركي بيجي ببشّرنا شي بشاره حلوة طاقق قلبنا… ليه ما بتصلي للملاك روفائيل يرافق هالمهاجرين حتى يوصلوا بالسلامة… ما نقيّتي الا عزرايل ومين قلّك انه ملاك وهوي قبّاض رواح؟..
قالتلي صحيح انا ختيرت بس مش خرفانة يا زياد روح سآل الخوارنة اصحابك هيدا منّه شيطان عزرائيل اسم ملاك يعني خادم الرب.. كلّفه ربنا يروح يقبض هالرواح… يعني عم يعمل واجبه… طيّب وانتي ليه عم تصلّيله؟ حتى يبطل ياخد هالشباب والولاد ويحرم اهلن ويحرق قلبن تعبنا نشوف نعوشي بيضا يا زياد ودموع مالحا اقوى من ملح البحر عالزعل… وشو بتقوليله كمان ! بصلّيله يجي ياخدني وما عذّب حدا بقا… واوقات بقدمّله صلاه خصوصة لحكّامنا… قلتلا ما تعتلي هم كل الشعب عم يعيّطلوا لعزرايل شي يقول عزرايل ياخدكن…. وعزرايل يريحنا منكن.. انتي هيك كمان؟.. قالتلي بالزمان ايام الحروب قلّي بيّي صلّي ربنا ياخدهن.. لأن اوقات ما في الا الموت بحلّها… ومعه حق..
فهلّق صرلي فترة بصليله وبقلّه يا عزرائيل ملاك الموت تشفّع فينا وبهالشباب.. بعد ما شافوا نهار متل الخلق.. زيح عنن شي شوي وروح صوب هالسياسيين وكل واحد خرب بيوتنا .. لك روح لعندن زورهن وقباض روحن وريحنا..
بس شو بدنا نعمل حتى عزرائيل ما بحبن ما بدّو ياهن..
اتطلعت فيها ومتعجب قلتلا منّك هينة يا خرفانة طلعتي بتفهمي اكتر مننا بكتير… معك حق اوقات الموت بحلّ كل شي… اوف شو صعبة حتى عدوك ما بتتمناله الموت.. كيف هنّي طلع بإيدن يقتلونا شي حريق.. شي غريق.. شي تشرحط على طريق.. وجوع وقلّة.. كيف؟!؟
وكيف وصلنا لمطرح ما بق عنا أمل غير بالموت.. وبشفاعته..
اوف شو حلوة امنيتك يترك هالشباب وما يحرق قلب اهلن علين.. وشو حلو لو جناب الملاك عزرائيل بزور هالسياسيين وبحمّلن على جوانحه وبياخدن … اتاريكي منك خرفانه .. طلعتي نازلة دعاوى فيهن وبتقولي عم صلّي… قالتلي وهنّي بقولوا عم يحكمونا بس الواقع عم يحاكمونا….
وبس فلّيت للحقيقة تعمّقت بكلامها وبغضّ النظر اذا دقيق او لاء.. الصلاة مش رح اتضرّ… وهيي عم تصلي وتشكي .. ونحنا عم نمشي على هالدرب وما منعرف امتين منتلاقى بجناب هالملاك.
حدث معي – زياد الرموز

Related posts

يبيع “الغزلة” لمساعدة شقيقته على متابعة دراستها في الخارج

Baladimedia

سليمة احترق قلبها على ابنها المهاجر – حدث معي – زياد الرموز

Baladimedia

في ناس بتتخلى عن حياتها عند أول عقبة و في ناس بتكافح و بتتحدى الموت لتعيش… الطفلة التي ولدت في الشهر الثالث وناضلت

Baladimedia