حاكم ببلد ... -
Image default
محليات

حاكم ببلد …

بخبّروا عن حاكم ببلد بعيد من هون قرّر يغيّر سياسته مع شعبه ويتواضع وينزل بيناتن يسمع شكواهن… فأوّل ما التقى فيهن بساحة البلدة قلّن يا أبناء بلدي الأحباء أنا قبل بمرة ما خلّوني اشتغل وما كنت اعرف كتير مشاكلكن ومصاعب كتير واجهتني، بس هالمرّة بطلب منكن توثقوا فيّي وتحطّوا ايدكن بإيدي وتقولولي شو ناقصكن وشو شكواكن؟!

صاروا هالناس يطّلعوا ببعضن وكلّن كبار بالعمر ومعتّرين ما بيسترجوا يحكوا، وما كان في الا شابّين صامدين بعدن بهالبلد صرخ واحد منّن وقلّو كيف بدنا نصدّقكن ونوثق فيكن وانتوا هجّرتوا كل شبابنا واخوتنا وما بقي الا هالختيارية المساكين ما عندن حدا.. وين الخبز وين الكهرباء وين الميّ وين الدوا وين حقوقنا…؟!

اتطلّع الحاكم بهالشب وقلّوا يا ابني شو اسمك انت؟! ردّ الشب وقلّو اسمي يوسف، ابتسم الحاكم وقلّو بهنّيك يا يوسف وبشكرك من قلبي انك قلتلي مشاكلكن كون أكيد إني رح اعمل كل جهدي وإشتغل على حلّ كل مشاكلكن ما تعتل همّ….

وبعد سنة من هالخطاب، رجع الحاكم مع الوفد يلي معه على ساحة البلدة وقال للشعب يا أحبائي انا معكن وحدكن وسهران على مصالحكن مين منكن عندو شكوى او مطلب…؟! سكت الجميع وما حدا فتح تمّه الا الشب التاني يعني رفيقه ليوسف، اتطّلع بالحاكم وقلّو وين الخبز وين الكهرباء وين الميّ وين الدوا وين حقوقنا؟!….. ووينو يوسف؟!

للأسف الحاكم بعده حاكم والخطاب بعده خطاب والشكاوى بعدا ذاتها وبدل ما الشعب يسأل عن يوسف، يوسف من مطرح ما هوي رح يسأل وين الشعب؟!

زياد الرموز

Related posts

ماذا ستبحث جلسة مجلس الوزراء الأربعاء؟

Baladi Media

عون وقّع قانون إعفاء بعض رخص البناء من الرسوم

Baladi Media

خطف وإطلاق نار في بعلبك.. ماذا جرى؟

Baladi Media